When people ain’t get wha dem want dem does seh all kind of things,This past week nuff people did want nuff thing and some of dem lef like a dog without a bone.Dem boys know that de hydro is important,Everybody know that. Dem got two Bill fuh pass in Parliament. These Bills important. De opposition tell de government that if it bring de Local Government Reform Bill then everybody can look at everything.But arrogance is a bad thing,De government behave like if de opposition can’t tell it nutten suh it refuse to bring de Local Government Reform Bill. Dem boys remember when dem mother tell dem that if dem don’t fetch de water dem ain’t gun eat,De government refuse to fetch de water and now it crying.Dem Minister guh pun TV wid snot running down dem nose and talking bout terrorism. Wha really happening is that de government campaigning fuh elections already. Dem telling people how de opposition bad. All because de opposition stop de wholesale thiefing,plan is to thief more hydro money but de opposition put on de brakes and that is why dem crying. Dem boys even see how people can lie,Gail tell de Parliament how she gun get dem fuh debate de Local Government Bill de next day,When sun raise she tell de parliament that she change she mind.Well is cuss and cuss back. One man claim how de hydro project dead when it ain’t dead. Dem boys seh that all that happening is people kicking up dem foot because dem can’t have dem own way. Boodoo did that too until he get a slap down,now de commissioners talking how he was a rude man and how he use to drunk and how he do strange things wid de commission money. Well dem same commissioners hang he out to dry and imagine he getting stiff already.De government was supporting Boodoo and that is why dem boys seh that dem remember birds of a feather and the saying bout show me you company.Talk half and watch out fuh more cussing, New-release-jordans .